Die Zick, die jöck et ävver och

„Weißde eijentlich dat de widder met Verzällche-Schrieve dran bes?“ frohchte mich dis Dach minge Mann. „Wie?“ jov ich stief verschreck zoröck, „ess et allt widder su wick? Sin dat allt drei Woche herr?“ Jung, die Zick die jöck et ävver och! Die verdammte Fastelovendszick! Mer kütt ze rein jar nix. Alle Futzlangks ess jet anders. Mol ess et en Fier em Fründeskreis wo do partu dobei sinn muss. Doför mussde deer eeschtens noch flöck e besonders jeck Baselümche zesammefriemele, weil die Fier unger dem Motto steit ‚Flöck dä ale Fummel her, löstich ess der Fasteleer‘ un zweitens muss de doherr, weil ohne dich op su ner Fier jo doch nix jebacken ess! En andermol läuf en Fastelovendsveranstaltung en der Äujelskess, die do jän sinn mööchs, un su e Schluffekinema kann einem jo vill Zick kläue. Zweschendurch wäde fließich Muuze jebacke, söns wör et jo kein richtije Fastelovendszick. Dann jitt et en Kinddäuf em Berjische. Do muss de och unbedingk hinfahre, söns krissde jo nit alles met, wat su en der Familich passeet; dann widder jeis de op en Sitzung em Jözenich weil die staatse Pluute jo och ens jezeich wäde müsse. Do hölts do deer dann vun der Klima-Anlach en öntlije Verkäldung, läs dich domet för e paar Dach en et Bett un schrumms, ih dat de dich versühs, ess allt widder Wieverfastelovend. Verkäldung hin, Verkäldung her, wa’mer och su langksam älder weed un nit mih jede Stuss metmache muss, ävver Wieverfastelovend ess jo bloß eimol em Johr, un et kann kei Minsch verlange, dat de an su enem Daach krank em Bett lijje blievs. Un su kütt et, dat do en der janze Zick för luuter fiere (un krank fiere) kei Auch un kei Ohr för de Nohberschaff mih häs. Et jitt alsu keine neue Klaaf, nix, wo mer drüvver jäuchele künnt. Schad!

Dat heiß, Momang, ich hann jehoot, dem Heukelhovens Ööschel singe Leienad hädden e Frembche en der Sträuv. Ich weiß ävver noch nix Jenaues, blieven ävver am Ball. Villeich kann ich demnöhks jet mih verzälle. Ach jo, noch jet, et Schmitze Lisbett hät fiese Knies met singem Schäng. No jo, dat kütt jo en der beste Famillije vör. Ich jläuven, et jeit öm de Jrosche, ich hatt ävver noch kein Zick för nohzehoke. En de Nohrechte jitt et em Momang nit ens der BSE-Schandal, wo mer sich drüvver opräje künnt. Nä, ich sage jo, wann nit zofällich jrad Fastelovend wör, et wör en stinklangwielije Zick! Dobei fällt mer en, dat ich neulich der Roggendorfs Henn jesinn hann, wie hä met singem iwich lange Jeseech ungerwächs wor. Dä sohch villeich us. Hä wor maskeet wie ne fingen Här, met Stöckelche un Zylinder, ävver dat Jeseech, nä, dat hätt Ehr ens sinn müsse. Ne richtije Flabes un Löres ess der Henn un dann su e Kostüm. Ich nemmen aan, hä jingk nohm Stammdesch. Apropo Stammdesch! Ich hann lang nix mih vüm Severin un singem Kusäng, dem Jüngelein jehoot. Ich merke schon, et weed wirklich Zick, dat ich mich ens widder jet mih öm de Nohberschaff kömmere, denn janz ohne minge Nohberschaffsklaaf mäht mer et Levve bloß halv esu vill Freud. Su, jetz brängen ich minger Nohbersch, der ahl Frau Hemmerbach e paar selvs jebacke Muuze erüvver. Die ess immer su allein zick ehre Mann, dä Engelbäät vör e paar Johr jestorven ess. Dobei hätt die fünf Puute jroß jetrocke, vier Junge un et Klörche. Ävver dat ess en janz eije Verzällche. Ich muss laufe, et weed Zick. Nä, mer hät der ävver och jet an de Jäng!